علشان جوزك مايطفشّ منك "..للكبــار فقـط"

علشان جوزك مايطفشّ منك
"..للكبــار فقـط"

هذا المقال بلغة عامية جداً ونستخدم فيه مصطلحات دارجة وجدنا أنها الأنسب لتبليغ الرسالة.. ونذكّر.. انها للكبار فقط

*******
لاننا عايشين في مجتمعات ذكورية بحتة، اعرفي ان أي تقصير منك هيخليه يقول: ياعيني عليّا.. ماهو لو انا مش لاقي راحتي في البيت يبقيى أدوّر عليها بره
بيدّي نفسه مبررات طبعاً.. ولو كان راجل بمعنى الكلمة، يبقي مش هيبص لا بره ولا جوه وهيعيش تعيس.. وانا يهمني الراجل اللي من النوع ده أوي، لانه أولاً حرام يعيش تعيس وثانياً تعاسته دي هتنعكس عليكي يافوزية وهتطلع عليكي بصور مختلفة
طب ليه يا بنتي والمواضيع بسيطة، مش أوي يعني، بس السعادة فعلا تستاهل اننا نبذل اقصى ما في وسعنا, وخاصة لو كان هو بيبذل اقصى ما في وسعه وان ماكانش نعلمه
ماعلينا، عشان جوزك يكون دايما مقبل عليكي يبقي لازم تهتمي بنفسك جداً وتعملي اللي هقول لك عليه
*******
1-
إزالة شعر الجسد، يعني مايصحش لما يبص على رجليكي يتلخبط فيها ويفتكرها رجليه, او يهرش في دراعك اعتقادا منه انه دراعه هو.. هتقولي البيت والاولاد، طيب ما انتي كمان من حقك تحسي انك انثى وهو كمان من حقه يحس بده.. و الاّ هيتحول لعنين لازقة في كل رجل ناعمة بره البيت.. فظبّطي كده عندك الشمع والحلاوة والكريمات المزيلة بأنواعها والأسهل حوّشي وهاتي سيلكابيل او أضعف الايمان ماكينة حلاقة بجوز جنيهات
*******
2-
حواجبك وشنبك وذقنك لازم تشيليهم اول بأول، ماينفعش يحس انه قاعد جنب الخُطّ خليل الخُطّ.. وخلّي بالك لان فيه رجالة كتير بيفرق معاها الموضوع ده، ولما بييجوا يبوسوا زوجاتهم بيحسوا بالشعر ده وبينفروا منهم.. طب وعلى ايه ودي حاجة مابتخدش اكتر من 15 دقيقة قدّام اي مسلسل
*******
3-
أما شعر المنطقة المؤلمة اللي كلنا عارفينها، فبينطبق عليها نفس الكلام اللي فوق.. فيه رجالة بتقرف جداً من الشعر في المكان ده والنتيجة انها مش هتقرّب منه، وانسي الأفلام اللي بتشوفيها او بتسمعي عنها
فيه رجالة مابيفرقش معاها لكن شيئ من التغيير مطلوب، وفيه رجالة بتفضّل الشعر في المنطقة ديه والفورَم المختلفة ليه.. وانتي لازم تعرفي جوزك من انهي نوع وتتصرّفي على الأساس ده.. ولو الشعر كثيف ومؤلم قصّريه بالمقص الاول قبل ازالته لتقليل الألم، مع المداومة على غسيل المنطقة دي باستمرار ووضع لوشن لرائحة أجمل، وتغيير البنتي يوميا على الاقل للحفاظ على صحتك ورائحتك الجيدة
*******
4-
الدُش: الدُش صديق المرأة, يعني لازم باستمرار تبقي نضيفة وريحتك حلوة, واكلة بصل أو توم يبقى تقومي بعدها تغسلي سنانك وتندغي لبانه ريحتها حلوة، ولازم تهتمي دايما بنظافة أسنانك. لكن نظام مسرحية المتزوجون واموااه اموااه يقوم يتكوّم, انتي الخسرانة يافوزية
وماتستنّيش لما يبدأ يدلعك عشان تعملي الكلام ده وتسيبيه وتقومي تاخدي دُش, بتعملي كده؟ يبقى ماتلوميهوش لما تطلعي من الحمام وكل خد عليه خوخة تلاقيه هو ماستنّاش الخوخ وبياكل رز بلبن مع الملايكة
*******
5-
شعرك يافيفي, الشعر تاج المرأة, مش هقول لك تشيلي الكوافير في الدولاب، لكن مش لازم تسيبيه مزيّت وريحته تطفش عشان مكسّلة تغسليه وبتوفري تمن الكوافير. لأ.. ممكن تستعملي زيوت او كريمات ريحتها حلوة، وتخليه نضيف باستمرار ولون وقصة مختلفة من وقت للتاني.. ولو مش قادرة تعمليه، يبقي تلمّيه لمّة شكلها حلو، لكن تقعديله دايما منكوشة وبشعر أبيض أو بالرولو في دماغك زي كائنات الفضاء عشان عندك شغل تاني يوم؟, طب وهو ذنبه ايه؟ في الحالة دي لو دوّر على انسانة أرضية خالية من الرولو أنا مش مسؤول
*******
6-
ودانك ومناخيرك تهتمي بنضافتهم كويس جدا عشان مايحسش انه متجوز مبيض محارة، ده غير ضوافرك. لو ماعندكيش وقت تهتمي بيهم وتبرديهم وتعملي باديكير ومونيكير وحاجات الستات اللي بنسمع عنها دي لأنك عاملة زي الطور اللي مربوط في ساقية, يبقى على الأقل قصّيهم ونضفيهم ودة أضعف الايمان
*******
7-
البرفيوم يا فوزية, مايبقاش الراجل هاريكي بارفنات على أمل انك تحسي وتهتمي بيه وبريحتك، وانتي مِكرتناهم.. حطاهم في كراتين يعني.. وشايلاهم للمناسبات وقاعداله برضه ريحتك طبيخ اليوم.. ولو واكلة فسيخ تبقى مصيبة سودة, لازم تتعودي ان ريحتك تكون حلوة على طول.. ده حتى عشان نفسيّتك انتي, الروائح الحلوة بتنعنش الانسان وبترفع من مووده. وطبعا مزيل العرق أو الشبّة ده قانون وبديهي.. أسوأ شيئ في الدنيا الست او البنت اللي ريحتها عرق وتقلب المعدة, فدايما حتى لو مش هتاخدي دش، ولو كنتي من الناس اللي عرقها غزير يبقي تغسلي المنطقة ديه كل شوية وتحطي مزيل لرائحة العرق
*******
8-
اثناء فترة الدورة الشهرية اهتمي بنفسك برضه وبريحتك، لان الدم بيعمل رائحة كريهة.. وحافظي على نظافتك، ولو حصل تسرّب لهدومك تغيريها على طول. ومتأذيش نظر الراجل وتقرفيه منك واحرصي دائماً على نظافة الحمام وارمي المخلفات بشكل لائق في الزبالة، يعني تحطيها في كيس الأول أو تلفيها في كلينكس بحيث مايبنش منها اي حاجة لأن كل الحاجات ديه بتقرف الراجل، ومش في ساعتها بس ولكن على المدى الطويل ايضا
*******
9-
جسمك لازم تحافظي عليه.. يعني ماينفعش الراجل يكون بيحب الرفيعين وسيادتك نازلة ضرب في طبق المحشي.. وياسلام لو لتر بيبسي معاه وتحلّي بأم علي, كده يبقى هتحدّقي بضرّة رفيّعة تطلّع عينك, لو بطّة ومش عايزة تلعبي رياضة يبقى على الأقل دايت ورجيم, ماتلوميهوش لما يبصّ لنانسي عجرم مادامت اللي قاعدة جنبه ماري منيب
*******
10-
المكياج سلاح ذو حدين, يعني لازم تكوني فنانة في استخدامه كوسيلة لتصليح بعض عيوب الوجه وابراز مناطق جماله، لكن تتحولي لعروسة مولد هيتسرع منك. وشيئ من الروج او الروجاجو في البيت مش عيب ولا حرام
*******
11-
نيجي بقي للملابس, أمانة عليكي بلاش تِئذي نظره, شيك موت برّه البيت وفي البيت بتطلع البيجامات المبهدلة وقمصان النوم بتاعة البتش اعتشيماد بيّاعة الأزوزا, ذنبك على جنبك, لازم تبقي شيك جوة البيت كمان، ولبسك نظيف مش مبقّع زيت وسمنة مطرح الطبيخ وناكشاله شعرك وطايحة في البيت زي الفرسة الشايعة, خلّي لبس للطبيخ.. ولبس نظيف وشيك للبيت.. ولما الولاد يناموا يبقى البيبي دول يصحى بقى
*******
12-
وأخيرا عزيزتي حواء عليكي بالابتسامة لأنها سحر وبتنوّر الوش وبتجذب الراجل دايماً وتخليه يحس بالسعادة وانشراح الصدر مهما كانت الظروف
*******
منقــــــــــــــــول
تحياتي
koko flower

هههههههههههههه عسل انا موافقكى فعلا لازم الست تهتم بنفسها جدا وتلبس كمان كل حاجة مش شرط قمصان وكدة لا بالعكس تلبس جينز وباديهات زى الى بيلبسوهم البنات برة عشان جوزها يعرف ان الى بيشوفوة برة هيشوف احسن منة جوة بجد موضوع جامد ياكوكو مشكوووووووورة

الحمد لله انه عجبك
شكرا علي مرورك يا حلم
ويارب كل البنات تستفيد من الموضوع ده
وتهتم بنفسها
لكي كل الحب والتقدير
koko

عدد الرسائل : 2 العمر : 34 تاريخ التسجيل : 23/10/2011

مشكوره يا قلبي على النصايح وبجد كلها صحيحه وكلامك سليم Wink

عدد الرسائل : 2 العمر : 29 تاريخ التسجيل : 26/02/2014

[color=#ff0000][strike]بصراحة أنا معاك في كل الموضوع بتشكرك كتير ياكوكو
ونرجوووووووووو المزي

» " " " GAME OVER " " "2
» " " " GAME OVER " " "3
» " " " GAME OVER " " "5
» " " " GAME OVER " " "6
» " " " GAME OVER " " "7